عادة هامة للحفاظ على نظافة البيت

بنزلت بوست من يومين باشجع فيه الناس لما ترجع من برة -مهما كانت تعبانة- ترجع كل حاجة مكانها ومترميش كل حاجة من الهدوم والاكسسوارات والشراب والايشارب …. في أي مكان ويأجلوا ده لتاني يوم
وقلت ان ده بينعكس على حالتهم النفسية لما يصحوا من النوم ويلاقوا الأوضة رايقة ونضيفة
فيه ناس كثير معجبهاش الكلام ، واعتبرت ان ده ضغط على الست انها متريّحش نفسها ، وسألوا : “وفيها إيه يعني لو سبت الترتيب ده للصبح”
أنا عاوزة أنصحكم نصيحة – ويمكن الي قرأ الكتاب بتاعي حايفهم ده أوي:
” عمرك ما حاتحقق حاجة في حياتك لو ماضغطتش على نفسك شوية في سبيل ترسيخ عادة جديدة “
إنك ترجع الهدوم وتعلقها أو تحطها في الغسيل ، أو تفضي الشنطة وترجعي الاكسسوارات مكانها ، كل ده عادة انت بترسخها ، في الأول حاتكون صعبة عليك وحاتحس بضيق منها وتدفع نفسك انك تعملها، بعد فترة حايحصل عندك إرتباط ذهني بين الرجوع من الخارج وخلع الملابس من جهة ، و ترتيب كل حاجة وترجيعها مكانها من جهة أخرى 
فحتلاقي نفسك مش قادر ترجع وترمي كل حاجة على جمب … وحتعمل ده بصورة أوتوماتيكية بدون تعب أو تفكير 
النتيجة حاتكون مبهرة بعد فترة قد تطول 

أما اللي بيتعمد يرجع ويرمي ويراكم ويلتمس لنفسه العذر ومايحاولش يبذل أي مجهود في ترسيخ عادة ، عمره ما حايحقق حاجة في حياته لإنه ببساطة لا يقبل بأي نوع من أنواع الضغط – ولو التدريجي- لترسيخ العادة دي ، فميجيش بعد كدة يشتكي ان البيت بيتبهدل بسرعة!